))
///////////////////////////////////////
رمت الودع البصاره
وسيل دموع
ع خدودا وآآآه سحبتها
وصرخت بالويل
قلتلا دخلك قوليلي
شوهو الموضوع
من هالشوفه ياميمه
انهديت الحيل
قالت شايفه العتمه
والذل والجوع
بالشهبا ماشيين وبسماها
اسود الليل
لما سمعتا قلتللا كرامه
لطه ويسوع
تلفي ماعندك بحياتك
لك فاض الكيل
///////////////////////////////////////
يعني ضعت بهالغربه
وفيها رح اموت؟؟.
قالت قدرك ونصيبك
مامنو خلاص
الغربه كربه ويا ويلو
اللي بلدو يفوت
طب ببحر لفوق راسو
لقرارو غاص
مات العطف على حظك
ولد الجبروت
لو تقلو حن يقلك
وجعين ورصاص
سكر تمك يا سافل
انا بدي سكوت
ياوللا لو تحكي واقفلك
الهم قناص
وشامت يفرح بموتك
ويغني ياليل
وحالا طبت بأرضا
وجرى دمها سيل
///////////////////////////////////////
قومي يابنتي ومللي
الدنيا افراح
بحاكي جثتها وعربنا
واقفين حوالي
بغمز ولمز يقولوا
شوفوا عقلو راح
ومافي دمعه من عيونن
نزلت علي
الا الشهبا هالحره
دق قلبا وصاح
شيلوا جنازتا دفنوها
مسكينه خطي
ما اظن من بعدا رح يطلع
ع الدنيا صباح
ماتوا الجوري والدفله
وعبير الهيل
///////////////////////////////////////
شعر ؛ d.. نذير دهان
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.