الشاعر أيمن بلال

... ف عينيكي .....

لقيت الراحة ف عينيكي

قلت ما بين رموشك أتخبي

وشفت ضحكة القلب ليكي

حلف زماني هي دي المحبة

لميت سنين العمر اللي باقي

قلت ليكي لو فاضل منه حبة

سقيت بشهدك سنيني الشراقي

خبيت الشيب خدت م الشباب حته

وجيت بالقلب أنده علي عيونك

وعيوني من عيون الناس تتخبي

والقلب إللي كان يشبه الصخر

بقي لين ما يعرف يعني إيه شده

عشق الليالي والقمر وبين النجوم

صورتها ملكة عالعرش ممتدة

وأنا العاشق علي باب ليلها

مستني تمد الإيد تشد القلب شدة

ياحب خد سنين المر من زماني

ونساني ليالي الجرح والشدة

أنا إللي كان الحب عندي كلمتين

وحكاية حب رايحة وحكاية جده

لا يوم سلمت لعيون قلبي

ولا يوم خدتني عيون واحدة

بقيت في الإحساس كما قيس

وبقت عيوني ف صورتك شاردة

أحس بنسيم الربيع قبل أوانه

وأشوف الحياه بالقلب وردة

... أيمن بلال

 .....