زطم ***
زطم...
على لي قليل لمروة سطل
لوحو في المزبلة
او دوسو بالنفخة ؤ ركل
راه ما يستهل تقدير
جرو نباح سقيم ضرير
الناس في الناس...
ومخو طايح عليه الردم
بل عقلو عامر خش
تحراميات والنفاق والفش
ؤ م يسوى في لميزان قرش
لهزان والتمكريه والسم
زطم
على ذاك قليل الاصل والعزة
عنداك تجر ؤدورها معاه دبزة
خوي طريقو ؤ في هناك فكر وخمم
لكسدة مزوقة من برا ولداخل مسوس
خاوي دفلى وفي لغباء مغمس
اش تدير برفقتو...
وعلى قرانو شطح وعزم
القائمة القلبية رافضاك
الحس والحدس والقلب اسيدي ما بغاك
بو زبال انت ؤفي حياتو مدرم
فاسمع يا ذاك لبغولي
باينة فيك مريض كاموني
الله يبعد علينا بلاك ...
وعقلية لقرودة وتربية لكوري ولغنم
حنا عشاق الحرف ديننا سماحة
لا احقاد رفيقنا القصيد لا الطياحة
في قلوبنا انهار الحب...
ومنا ما تشوف غير لكلام لمدسم
سير راك معروف هبيل تالف
صحبة مثالك والله عليها حالف
الوحدة حسن وسلامك كولو ؤتبرم
فاشباه الرجال بحالك سوقهم خاوي
لقوالب والتشلهيب لفوحان وتلاوي
حسب خمسة ؤتلاح ...
بل خوي وللقبح زيد جمع وعرم
فذيك الحقيقة لحرقاك
صورتك في مرايتي ما مواتياك
دير النفس ومن الرجال تعلم
بل زطم ؤزيد تقدم
صحاب لعصا في الرويدة
لفشل طاليهم لجهل ولغبينة
مخلوق باش يطفي الخير ويهدم
زطم
على لي قليل لمروة سافل
بل خليه راه في الاهمال حاصل
وعلى دربو بعِد و تبرم
تضمن السكينة وراحة البال
مع الأصيل كون ولد لحلال
زيد تقرب منو ....
وعلى الشماتة زطم ؤدرم
الشاعر والزجال : أحمد الكندودي
*** المغرب ***
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.