عليك شريف
***
ذاك راه عليك شريف
ما تقيسو اشارة
ما تهزوا خسارة
مخلوق نقي ظريف
بل ما يرضى يطيح
كاع فصولو ربيع ؤ صيف
جنى الطيبة من بكري
الرجلة فيها لا تدوي
وخا قسوة لحال ولحفاري...
صمد ؤبقى شريف
ما داسو لحظو ولا طاح
صبر وتحمل ومحصولو فاح
عبر وحكم ...
صادق عفيف
خفيف
ما يحط راسو في النخالة
ما رفقتو سلعة بخسة ونذالة
ما يجوق على خاوي والطبع نظيف
شريف
بز منك ما فيه خواض ولا تلاوي
ما نمام ما هدام ما هداوي
الصفا والنقا ...
والبصمة اصيلة ما جنس قصيف
تطير حتى تتعلى زعما تهينو
غادي تفشل دعاوي لوالدين حميينو
فكول ذيك الصورة الباهتة ....
راها تتخصك وفوت ذوك لخرايف
لا تحاول على الناس تسقط حكامك
كلها وطباعو وانت لك طباعك
فبلا ما تكدد في لحم خوك ...
واطلب من الله اللطيف
نقي دواخلك من الضغينة
بعد على كل عافية عفينة
دخل غمادك ...
ولا ترمي حسب مزاجك الناس بالزيف
وهو ذاك الشريف
عرفاتو حروفي
شكات لي قوافيه والبحر الوافي
ما خلواض ما عاش شبح ولا طيف
ولد باب الله كلشي عندو بالنية
صخرة ما يتنحت زعما يعود حدية
ممنوع يتحننش ويتعقرب....
ولا يولي جنس قصيف
ما نهب ما سرق ما مد يد
ما راوغ او خان لكلمة والوعد
ما غرر ببنادم ما باع الوهم على الرصيف
وانت على هواك باغي توسخ كلشي
هذا قديم هذا شادو زمان الكوتشي
ؤ ل ما يشبهك...
تنعتو بأقبح لواصيف
فانعت ود حتى تفش وصف
لكن الشريف بأعمالو ونضجو
ما تحركوا عجاجة وخا وجعو
ما يرجع طعم في صنارة...
لسادي عور ضعيف
هو عليك شريف
***الشاعر والزجال: أحمد الكندودي ***المغرب
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.