تخرمزات
***
تخرمزات
جذور الود رشات
الصلة بخروها لوم وجفا...
تسوس حبلها وتقطعات
لقاو لعديان منين يدوزو
هرسو لبيوت ردوها مشتة زيرو
قساحت لقلوب وغابت الرحمة...
لمحبة وطريق لخير تسدات
لمشاش هرسو لحاجز
راسي يا راسي عماد وعكاكز
لا اخلاق لا وداد ...
وفي حملتها غرقتْنا لحياة
ما فهمنا سواريها حيت جهلونا
بالتخربيق وابواق لميديا غربونا
عدنا كالغربان ...
لا ملة لا دين والنية ذبالت عروشها ولوات
تخرمزات
تلفوا الرجل ولمرأة
قرارات شيطانية بالمرة
ماسونية ؤ شلا هدرة
شعلو ا بيناتهم لعوافي ؤ طلاوهم حسرة
فقدو لموري ولمحاكم ب ب لوزيعة عمرات
قالوا للمرأة على هذا لحال ثوري
حطي الرجل عدوك ولعب لعنتوري
ما تدير بيت ولا وتاد ...
ؤفين ما راحت الشمس تبات
الراجل في لغم وزادوا غرقوه
لا فين يكدح وبيتو هدموه
نهكوه بقلة ما يدار تلفوه وشيبوه
سنوا عليه قوانين الجربة...
شي هرب ؤ شي حركَ ؤ شي ملاوح في البارات
تخرمزات
لمدرسة صافي خربوها وباعوها
كثر لجهل والشلاهبية لذاك الصندوق رهنوها
شروط همش وفقر وهرس اللبنات
ضاعوا لولاد ولبنات
شي ملاوط ؤشي معربط ؤ شي شاد لقنات
حيت عواجت بهم سفينة النجاة
مات الامل وما بقات غير الصهدة...
تجوف الجوف وكرمت لكبدة
والأجيال بنارها غادة تشوط كثر ما تكوات
تخرمزات
لا صحة لا أمان لا فليسات
شي هربوه ؤ ل بقى خسروه في الرهان
لغلا والذلة فآش من عيشة بقات يا فلان
كلها ودراعو ...
وأيام الجريحة والسيبة رجعات
تخرمزات
فنوض شنق على منشار لخيبة
قوي صلتك باهلك ؤ زرع بين خوتك كل طيبة
حارب دعاة الشر والدونية
ل بغاونا زريعة رومية ...
بلا عدل بلا مساواة
بل نقيوا الروح وديروا لخير موضة
فلسفة الصندوق الاسود باتت باينة مفروضة
قالوا خرمزوها...
فها هي تخرمزات
الشاعر والزجال: أحمد الكندودي ***المغرب ***
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.