بغي راسك
***
قبل ما تبغي الناس...
بغي بعدا راسك
عطي لنفسك كل لعناية
منتصب واقف ما حاني ل غاية
غادي ب لمهمل...
ؤ لابس ثوبك وقياسك
بغي راسك
دير العفة والعزة كساتك
تهلا فيها ؤ زيد تهلا
شبعها مْحَنة تعطيك لغلة
وعنداك تتسنى من لغير إحسان...
يعود عليك عافية ويهد ساسك
ؤ قبل ما تعيش في ندير وندير
غسل دواخلك من القيل والتسرسير
طفي نار المس وشد بلاك ؤ باسك
عليه كون لوصي ولعساس
قتل في دواخلك ذاك الظن والوسواس
تعمد في الصفا ولوفا...
وخوذ السماحة نبراسك
فنهار تتطهر من لعيوب والقسوة تمحا
ما يبقى لا نفاق لا بهوت ويخضار حس الرحمة
ذيك الساعة حب الغير ...
ؤ تهلى في حبابك وناسك
حيت هذا زمان التبلحيس والبهتان
ل عاد فيه الصدق ولمحبة بسعر وثمان
حس مكلف وجريحتو كرمت نفاسك
بغي راسك
باش تبغي الناس يا فلان
نيشان نقولها فافهم وبالبرهان
تعيش عيان والخبث لباسك
جامي يعود القاسي على راسو حنين
فكيف يجود بالطيبة وفي شرو غارق ينين
حيت ما اختار غ القبح ولعفن ...
ل بهم يزيدك الم ويطير نعاسك
بل ما تعود تلقى راحة ولا هنا
ذيك لكبدة جمرها ونسى المحنة
عطي نفسك قيمتها ...
ففيها شفاء من تابعة قواسك
بل تمرح ونشط ونسا
كل هم وكل فقسة
سعد وكركر حتى يبانو ضراسك
بغي راسك
***الشاعر والزجال: أحمد الكندودي ***المغرب
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.