شعر /سعيد حمدي محمد
*************
أرضي الطيبه يا حافظه مجهودى
ياسترى وعرضى واصل لوجودى
يا شاربه عرقى بالحنين جودى
العمر فيكى قضيته مرار قاسى
عرق جبينى نازل على فاسى
بدرتك همه وحماس ونهجت انفاسى
خايف يخيب العشم وتدبلى عودى
★★★★★★
محراتى سرح ضفايرك فى الضحى البدرى
والفاس خطط جبينك والميه راح تجرى
والساقيه تعزف نغم ويزقزق القمرى
ع التوته واقف يغنى مواله فرحان
لما روينا الشراقى اللي كان عطشان
وادى الندى يسرى في قلب العيدان
واطمن البال وايمانى ملا صدرى
★★★★★★
شب النبات فارس فى طوله وعرضه
يلعب ويا النسيم لما خضر ارضه
هزم الآفات ودايما للوحش طرده
يتباهى بسواعد عفيه سهرانه ترعاه
شايفه السعاده وكل الهنا وياه
وإيمانهم بالله هوه السند والجاه
وحمدو الإله بكل صلوات فرضه
★★★★★★
شعر "سعيد حمدى محمد
7/3/2023
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.