غاب لمعقول
***
باش غاب لمعقول
راب حُمًار الخيمة
عادت سْما لْحال مْغَيْمة
تَفْقد الدال والمدلول
حرابي في قش الجوف داعوا
كلها وجهدوا كلها ودراعو
ظَلًم المطلع ...
ؤ غاب الصدق المأمول
ؤ باش غاب لمعقول
لقمح سَوًس والفول
جفت لقلوب ...
والموضة نفاق والقول المعسول
وهي العيون
طالقة سْهامها والخناس
شي ياكل شي والعلة وسواس
عادت اليد للحق سريفة ...
كُلاًب وغول
لا صدق في القول
لمحبة تلاوي
لكذوب ؤ لغا لخاوي
تلون موضة ...
مرة كرموس مرة زعبول
حتى ذاك الضمير نعس
عياه التشلهيب القيل والقال والرفس
قلة النية ...
وفِيس الانانية كامل مكمول
بالمعقول
ضوات بلدان الغرب مياسة
لخواض في الخلف خلانا تراسة
فرطنا في الصفا ...
ؤ عادت لمحبة دفلى
والخلق على الريال مذلول
فشوف هما شحال بعيد مشاو
الرفاهية والعدالة ما نهبوا ما داو
خدموا بلادهم ...
والساس إخلاص ومعقول
فيا ذاك الغول
لربك غدا اش غادي تقول
باك صاحبي والحطابة
لْفاع لحال وذياب الغابة
جْماعة هْرُب وهرًب ...
سرطان العدالة والحياة ولمعقول
ؤ ل به الناس وصلوا وعلاو
ركبوا النقص ؤداروا فينا ما بغاو
باش ردينا التخلويض عادة
ما بقى أمل ولا صفا ولا إرادة
عاد لعقل مصفد ب تحراميات...
وفي سوق لحيال مربوط معلول
غاب لمعقول
***الشاعر والزجال: أحمد الكندودي ***المغرب
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.