ل ية تحت عنوان :
السعد لكحل ***
لا تقول سعدي كحل
رْجَل منحوسة...
فينما زطمت توحل
انت راضع الصفا ولوفا
وهما راضعين الشر ب لوفى
ؤ عيبك أنك معقول ؤ ولد الأصل
ذيك لماركة لردوها خرافة قديمة
باش تفقد الشان لمحبة والقيمة
زرعك هذاك...
وخا تعيى ما تبدل
الصادقين بضاعة كاسدة
صحاب لعقول في لعذاب جثة راكدة
ظلام الحال...
موضة ساروت بارتو ؤ كاع ما تْقَفًل
او تعود تتلهى بطبع الدون
كثيرة سلعتهم والنكير عربون
في العبثية غامسين...
راضيين بالمسخرة وقيحهم مْكَلل
لا كلمة لا عشرة لا عهد معاهم
ما يعرفوا محبة التلخبيط والطجة شداهم
هز سطل وحط سطل مْصَندل
لا تقول سعدي كحل
قرا الصورة في المجمل
بل خاص دينك يعود تشلهيب
ذيك النفس تقتلها والضمير يغيب
تترهط بحالهم ...
ايلا بغيتي تحيا الزمان لمبهدل
لا تقول سعدي كحل
الفرحة حلفات ايلا تطل
كلها ومكتابو
يعيش عقايب اختيارو ورايو
ملهوف معذب ؤحتى يهزوه في لْمَحمل
في سوق تْبَلْحس كثاروا الطنازة
تخلطات ها الخاوي ها العبازة
ناس خارج التغطية ...
لا ضمير لا خلق ومن عندك كمل
فعنداك تعود منهم وتَجْلى
تعود تاتا تصدا دواخلك وتبلى
تمشكل بحالهم وفي سوقهم تعكل
يردوا حياتك ب لعوافي بركان
تولي غمة وتموت فيك الثقة والامان
يقتحم الجرو دواخلك ويتسلل
غير ب لمهمل
بيع لي باعك
فوتو وبني براجك وباعك
لا تربي كبدة على الخملة
ل يلحسوك كلك ؤ يحولوك هْمَل
فاعقل وتْعقل
ما تدير ثقة ما تدير امان
زمان لعيان هذا لعناد ولغنان
كَلثة التلاوي ؤ ل دخلها يحصل
قالوا صحاب الطيبة انقرضوا
ما يتخلفوا ولا يتصنعوا ولا يتعوضوا
صحاب الكلمة والشرف هذوك...
لا كذوب لا تحراميات لا دغل
وانت يا صاحبي غادي تقضي في المحنة
حيت سوكتي بالظلمة والعنة
وشؤمك وظنك كْحُل
عيش ؤ افرح لعمر غادي
عقلك لا تطليه بلالة ؤ مالي
وحظي راسك من طبايع لوسخ ولعفن
ؤ شحال مكواك ...
مع جنس مرفوع ملتو رهن وبلل
هز عينيك وتوجه للعالي
هو ل عارف حالك وبك يبالي
ينجيك من الغفلة ...
وتعود الفرحة فغير دير لقنعة صديق وخِل
يرجع السعد لكحل راحة
لبس قياسك وعلى لخلق لا تعول
كَاد منوالك
خلي القرشال يقرشل ويقاد حْوالك
والغربال يصفي ويغربل
لا تقول سعدي كْحل !؟
*** الشاعر والزجال: أحمد الكندودي *** المغرب
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.