👍عامية مصرية 👍
بقلمي/ أشرف محمد السيد
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
*هلعب واعيش ويا الكبار
واملي البتاع كوسة وخيار
يمكن افوز بوظيفة شيك
و ألحس عسل بعد المرارة
*صوتي اندبح والعيشة نار
بكفاية خوف دا القط. فار
و القرش عارف سكتوا
خليك جرئ و خد القرار
*شوف العنين تقدح شرار
كان من زمان بياع خضار
أصبح مهندم ، يترسم
الشر خير ، و الطيبة عار
*رغاي مولف ع الشجار
الليل بهيم ، و يقول نهار
راكب و عامل شلتوا
تزعق و تاكل ف الغيار
*عندك فلوس ،اعمل مزار
تسرق نفوس ، وتبيع هزار
دنيا بتدي للعبيط
أما الجدع ، خايب حمار
*هنزل و اهلل ، للكبار
يمكن تصيب،وافتح بازار
الدنيا واقفة ف خلقتي
بتقولي روح ، وإلعب قمار
*خليك محافظ ع الشعار
وإللي سرق ، عدي و طار
ناقص شريف،من غير شرف
سارق جمل ، بياع اثار
*خايف أبيع ، ينوي الفرار
ولا اتلهي و اطفي الزرار؟!
حيران و تهت ف سكتي
أصل التعب بيجيب شحار
*إثبت و حافظ ع الوقار
و امسح ذنوبك ، بإعتذار
جايز تروق، من غير سبب
و تنول نصيبك بالدولار
,,,,,,,,,,,,,,,,,,, بقلمي 🖌️
أشرف محمد السيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.