..
ليه الظروف مابتعرف الا الطيبين
خنقه وخوف على اللى جاى من السنين
قلوبنا صافيه وطيبه
ونفوسنا حلوه قريبه
لكن بقى الدنيا كده
هانعمل ايه ونروح لمين
ليه الظروف مابتعرف الا الطيبين
...
لا عمرنا بصينا للناس اللى فوق
ولا مره اتمنينا ليهم أى سوء
لكن بندعيلهم يزيدهم ربنا
ولا عمرهم يبقوا فى يوم كده زينا
ولا حد منهم يتظلم
ولا يحسوا بالألم ولا بالأنين
ليه الظروف مابتعرف الا الطيبين
...
كل المنى نفرح فى يوم وتهدى أحوالنا كده
لو رزقنا بقى يوم بيوم هانحمده ونقول رضا
ونبقى خدنا حظنا
ونقول كمان مين قدنا
اتفك أهو خلاص كربنا
احنا اللى كنا مطحونين
ليه الظروف مابتعرف الا الطيبين
...
يارب ياسامع الدعاء انا جيت أهو واقف ببابك
عبدك أنا وطالب الرجاء ندمان على انه فى وقت سابك
ارزقنى رزق من الحلال
يارب ياكريم ذو الجلال
ماهو احنا برضه الطيبين
لغيرك انت هانروح لمين
ليه الظروف مابتعرف الا الطيبين
......
عاشق الأنا محمود الشيخ
17/8/2023
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.